Zaharkitutako nabigatzaile bat erabiltzen ari zara
We strongly recommend any of the search engines listed here under for optimum web site visualization: Google Chrome, Mozilla Firefox or Internet Explorer 11. Thank you very much.
Bilbok osasunaren arloko ingeniaritzari buruzko estatuko kongresua hartuko du Euskadin lehen aldiz
Azaroaren 4tik 6ra, Euskalduna Bilbaok Osasun arloko Ingeniaritzaren 43. Estatuko Kongresua hartuko du, sektoreko Estatuko hitzordu nagusietakoa. Kongresua lehen aldiz egingo da Euskadin, “Ospitalearen BER-EBOLUZIOA: ingeniaritza eta osasun-eraldaketa” lelopean. Espainiako Ospitale Ingeniaritzako Elkarteak (AEIH) antolatutako topaketak, hiru egunez, ospitale-ingeniaritzako eta -arkitekturako profesionalak, osasun-arduradunak, asistentzia arloko profesionalak, unibertsitateak, erakundeak eta enpresa teknologikoak bilduko ditu.
Aurtengo edizioak teknologia berriez harago begiratzea proposatzen du, funtsezko galdera biri heltzeko: nola ari da aldatzen ospitalea? Eta zer gaitasun berri garatu beharko dituen datozen hamarkadetako erronkei erantzuteko?
Adimen artifiziala, datuak, robotika, automatizazioa, azpiegitura berriak, jasangarritasuna eta eraldaketa digitala izango dira programaren ardatzetako batzuk. Edukiak lau esparru nagusiren inguruan antolatuko dira: pentsatzen duen ospitalea, jarduten duen ospitalea, egokitzen den ospitalea eta bizi den ospitalea. Lau ikuspegi horietatik aztertuko da nola ulertu hobeto ospitale batean gertatzen dena, haren jarduteko gaitasuna handitu, etengabeko aldaketara egokitu eta zaintzaren giza dimentsioari eutsi.
Kongresuan Estatuko eta nazioarteko adituek hartuko dute parte, hainbat osasun-sistematako arduradunekin batera. Hasierako hitzaldia Juan Luis Arsuagak emango du, Madrilgo Complutense Unibertsitateko Paleontologiako katedradunak.
Iazko edizioan, 1.500 profesional, 60 hizlari eta 130 enpresa baino gehiago bildu ostean, aurten Bilbo eta Euskalduna Jauregia ingeniaritzaren, medikuntzaren, erizaintzaren, arkitekturaren, teknologiaren, kudeaketaren eta berrikuntzaren lotune bihurtuko dira.
Etorkizuneko ospitalea nolakoa izango den ez ezik, hura eraikitzeko zer ikasi beharko dugun eta zer egin beharko dugun beste modu batera pentsatzeko hitzordua izango da.
